اسمي أكمل ..... و عايش من زمان كان نفسي أكون ظابط بس اللي حصل ان الحزن ظابط و لما كنت بخاف أحكي كنت بابكي ... مش عارف ليه الناس بقت كدة ... كلهم بقوا زيي .... كان نفسهم ..

اتخرجت من كلية الآداب قسم اللغة العربية عشان أبقى كويس في الأدب و لما اتخرجت حسيت اني بقيت قليل الأدب ... مبقتش اصدق زي زمان ... و مبقتش طيب زي زمان ... و مبقتش عادي ... رغم إنه طول الوقت مليش وظيفة ... غير اشتغال البشر ... حتى لما لقيت وظيفة كانت برضه اشتغال البشر ... و لما غيرت مهنة بقت بشر اشتغال .... مش عارف ليه لازم لما نشتغل نشتغل نفسنا و لما اشتغل باشتغل البشر ..

يمكن أكون مش أطيب واحد انت قابلته .... بس ممكن أكون أكتر واحد هاتفتكره ... إما تحبني ... أو تستغربني ... أو تستتفهني ... المهم انك هاتفتكرني ...

أنا سائح عربي ... حتى في بلدي ... سائح عربي ... لما كنت في الكلية ... كنت سائح عربي بيعاملوني كدة يمكن عشان شكلي بقى زي الخليجيين ... عشان عشت معاهم عمري كله ... بس نسيت أقولكم حاجة أنا عمري ما نسيت اني مصري ...

الأسطـــورة هي انك تفضل طول الوقت مصدق انك وهم و تتفاجأ انك أخطر من الوهم انت .. و لا حاجة ...  وها تبقى الانسان الوحيد اللي لقبه و لا حاجة .... تقدر تقول عن نفسك كدة ... أنا أقدر مفيش واحد مصدق انه عبقري و يبقى مش غبي ..  و مفيش واحد فاكر انه مبيغلطش و يبقى مش جاهل ... و نفسي أشوف حد يقول مبعرفش ... كلنا اتقلبنا صناع مهرة و عباقرة الأدب و السياسة و الفن ... أنا شخصياً مبعرفش في السياسة و ماليش في الكورة .. و بحب الأفلام و الأدب ...

مبقتش عارف احنا رايحين فين بس كل اللي أنا عارفه ان احنا بعدنا كتير قوي عن الشط ... يا ترى لما نرجع هانعرف نفسنا ... 25-6-2012